झापा, प्रेममा न उमेर, न जात, न सम्पत्ति, न शारीरिक क्षमता हेर्ने चलन छैन भन्ने कुरा हामीले अक्सर सुन्ने गर्छौं। तर झापाको कनकाई नगरपालिकामा डोल्मा पासाङ्ग तामाङ र दिलिप थापाको कथा भने वास्तविक जीवनमा यसै कुरा प्रमाणित गर्छ।
कनकाई–७ निवासी ३० वर्षीया डोल्मा शारीरिक रुपमा अशक्त छन्। उनका दुबै खुट्टा चल्दैनन्, राम्रोसंग बोल्न पनि सक्दिनन्। सामान्यतया यस्तो अवस्थामा विवाह सहज हुँदैन। तर ३२ वर्षीय दिलिप थापाले उनलाई यस कमजोरीसहित स्वीकारे र जीवनभर सँगै बस्ने प्रतिबद्धता जनाए।
डोल्मा र दिलिपको सम्बन्ध गत फागुनदेखि फोनमार्फत सुरु भएको थियो। दिलिपले उनलाई माया मात्र गरेनन्, हरेक आवश्यकता र चुनौतीमा साथ दिने वाचा पनि गरे। दुबैले जीवनभर खुशी–दुःख सँगै बाँड्ने कसम खाए।
डोल्मा हिँडडुल गर्न असमर्थ भएकाले, दिलिपले घर नजिकै अटो राखेर उनलाई घरबाट सुरक्षित रूपमा लिएर जाने योजना बनाए। गत शुक्रबार राति, सबै सुतिसकेपछि, उनले डोल्मालाई बोकेर अटोमा पु¥याए। परिवारले पनि यस जिम्मेवार व्यवहार देखेर अन्ततः विवाहको तयारीमा जुटेको छ।
डोल्माका पिता भन्छन्, “सानै उमेरमा पोलियोले छोरीलाई अशक्त बनायो, तर आज उसको जीवनमा प्रेम, सम्मान र खुशी भेटिएको छ। हामी खुसी छौं, र ज्वाइँ–छोरीलाई सुरक्षित भविष्य दिने छौं।”
स्थानीय समाजसेवी शेरबहादुर थापाले भने, “आजकल प्रायः नकारात्मक समाचार मात्र सुनिन्छ। यस्ता प्रेमिल जोडीले देखाएको समर्पण र माया प्रेरणादायी छ। समाजले यस्ता जोडीलाई सहज जीवनयापनमा सहयोग गर्नुपर्छ।”
यो कथा केवल प्रेमको मात्र होइन, मानवता, करुणा र दृढ निश्चयको प्रतीक हो। भौतिक कमजोरीले माया रोक्न सक्दैन—डोल्मा र दिलिपले हामी सबैका लागि साँचो प्रेम र समर्पणको शिक्षा दिएका छन्।
–––
