बुबाको मृत्युपछि छोरीको पढाई खर्चका लागि सात लाख सहयोग [तस्बीर सहित]

झापा, बाह्रदशी गाउँपालिका वडा नम्वर – ७ डाँगीवारी निवासी ३८ वर्षीय पुष्प लम्सालको ब्लड क्यान्सरबाट मृत्यु भएपछि तीन वर्षीया छोरीको पठन पाठनका लागि भन्दै प्रवासमा रहेका नेपालीले झण्डै सातलाख रुपैयाँ सहयोग गरेका छन् ।
व्यवसायी संघ कतारका अध्यक्ष तथा अन्तराष्ट्रिय झापाली समाजका प्रवत्ता समेत रहनु भएका महेन्द्र चम्लागाईको नेतृत्वमा ६ लाख ७१ हजार ३ सय ८९ रुपैयाँ मृतककी छोरी समिरा लम्सालको पढाई खर्चका लागि भन्दै आज प्रदान गरियो ।
बिर्तामोडस्थित नेपाल इन्भेष्टमेन्ट बैंक लिमिटेडमा आयोजित रकम हस्तान्तरण समारोहमा अन्तराष्ट्रिय झापाली समाजका प्रवत्ता चम्लागाईले मृतककी श्रीमती मिरा काफ्ले लम्साल र वुवा नारायणप्रसाद लम्साललाई सो रकम हस्तान्तरण गर्नुभएको थियो ।
रकम हस्तान्तरण समारोहमा बोल्दै चम्लगाईले भन्नुभयो – पुष्प जी विरामी भएको र उपचारका लागि मोटो रकम चाहिने भएपछि हामीले कतार र दुवइमा रहेका प्रवासी नेपालीबाट रकम सङ्कलन गर्न शुरु गरेका थियौं तर उहाँको उपचारकै क्रममा निधन भएपछि उक्त रकम छोरीको पढाई खर्चका लागि प्रदान गरिएको हो ।
लम्सालको उपचारका लागि कतारबाट ४ लाख ५० हजार र दुवईबाट २ लाख २१ हजार ३ सय ८९ रुपैयाँ संकलन गरिएको हो– चम्लगाईले भन्नुभयो ।

पुष्पजीको उपचारका लागि म आफैंले मात्रै दुई लाख रुपैयाँ प्रदान गरेको थिए उहाँले भन्नुभयो – म सहिहत प्रेम चम्लगाईबाट २५ हजार, जीवन चम्लगाईबाट २५ हजार प्रदान गरिएको थियो ।

त्यस्तै उहाँको उपचारका लागि अन्य प्रवासमा रहेका थुप्रै नेपालीले सहयोग गरेको चम्लगाईले बताउनुभयो ।
समिराको पठन पाठनका लागि प्रवासी नेपालीले ६ लाख ७१ हजार ३ सय ८९ रुपैयाँ सहयोग प्रदान गरेपछि समिराका हजुरवुवा नारायण प्रसादले समेत २८ हजार ६ सय ११ रुपैयाँ नातीनीलाई प्रदान गर्दै सात लाख रुपैयाँको नेपाल इन्भेष्टमेन्ट बैंकमा मुद्दति वचत खाता खोलेर रकम जम्मा गरिएको छ ।
लम्सालको ब्लड क्यान्सरको कारण गत असोज १२ गते उपचारकै क्रममा सिभिल अस्पपताल काठमाडौंमा मृत्यु भएको थियो ।

>