झापा ।
दमक–८ मा रहेको दमक हस्पिटल एण्ड रिसर्च सेन्टर प्रालिमा आर्थिक अनियमितता भएको तथ्य बाहिरिएको छ ।
देशका विभिन्न ठाउँमा रकम ठगीका घटनाहरु बाहिर आइरहेको बेला दमक अस्पतालमा आर्थिक अनियमितता भएको तथ्य बाहिरिएको हो । अस्पतालमा आर्थिक अनियमितता भएको भन्दै सञ्चालकबिरुद्ध जिल्ला प्रशासन कार्यालय झापामा ठगी उजुरी परेको छ ।
अर्घाखाँची स्थायी ठेगाना भएका प्रालिका अध्यक्ष डा. निराजन भुसाल र सञ्चालक डा. चन्द्रप्रकाश गैरेले कम्पनीको बैंक खातामा रहेको रकम अनियमित तवरले झिकेर अपचलन गरेको भनी अन्य सञ्चालक तथा लगानीकर्ताले प्रमुख जिल्ला अधिकारी समक्ष आवश्यक कारवाहीका लागि उजुरी दिएका हुन् ।
उनीहरुले दिएको उजुरीमा भुसाल र गैरेले विभिन्न व्यक्तिका नाममा कम्पनीको बैंक खाताबाट रकम निकालेर अपचलन गरेको दाबी गरेका छन । सञ्चालक सदस्य मोतिलाल बरालसहित ९ जनाले दिएको सामुहिक उजुरीमा आरोपितद्वयले ३ करोड ४१ लाख रुपैयाँ अपचलन गरेको उल्लेख छ ।
दमक–८ नम्बर वडा कार्यालयले बनाएको हस्पिटल विवाद समाधान समितिले तयार पारेको प्रतिवेदनसहित प्रमुख जिल्ला अधिकारीलाई दिएको सो उजुरी जिल्ला प्रशासन कार्यालयमा मंगलबार दर्ता भएको बिहीबार पीडितहरुले दमकमा पत्रकार सम्मेलन गरेर जनाएका छन् । उजुरीमा विभिन्न व्यक्तिहरुको सहमति बिना नै उनीहरुको नाममा पटक–पटक बैंकबाट रकम झिकेको प्रमाण समेत संलग्न गरिएको छ ।
हस्पिटलका कार्यकारी निर्देशक तेजराज घिमिरेलाई समेत दबाबमा राखेर गैरे र भुसालले त्यस किसिमको अनियमित कृयाकलाप गरी ठगी धन्दा चलाएको पीडितहरुको उजुरीमा उल्लेख छ ।
कम्पनी नियम विपरीत निजहरुले अन्य सञ्चालक तथा शेयर सदस्यहरुको उपस्थिती र बैठक बिनानै एक्लौटी रुपमा गएको भदौ ६ गते आफ्ना नाममा मात्रै शेयर कायम गरेको देखिएकाले किर्ते तथा जालसाँजी समेत गरेको आरोपितहरुको ठहर छ ।
यसअघि सो संस्थामा भएको समस्याका बिषयलाई लिएर निवेदन परेपछि विवाद समाधानका लागि दमकको ८ नम्बर वडा कार्यालयले पनि विवाद समाधान समिति बनाएको थियो । सो समितिले तयार पारेको प्रतिवेदन समेत वडा कार्यालयमा बुझाइएको समितिले जनाएको छ । आरोपित भुसाल र गैरे दुवै जना अर्घाखाँची स्थायी ठेगाना भएका व्यक्ति हुन् । ति मध्ये गैरे दमकमा नै ॐशान्ति डेन्टल सञ्चालन गर्दै आएका छन् भने भुसाल अन्यत्रै बस्ने गरेका छन् ।
गैरेले स्वास्थ्य निकायको उपल्लो तहसम्म आफनो पहुँच रहेको बताउँदै स्वास्थ्य क्षेत्रका चिकित्सक तथा अन्य स्वास्थ्यकर्मी र कतिपय राजनीतिक, सामाजिक अगुवाहरुलाई समेत स्वास्थ्य क्षेत्रमा लगानी गर्न भन्ने गरेको र लगानी गरिएको पैसा आफूले अपचलन गर्ने गरेको बताइएको छ ।
उजुरी गर्नेहरुमा बराल, सञ्चालक सदस्य नारायण श्रेष्ठ र हेमराज पोखरेल हुन् भने डा. सञ्जय रिमाल, डा. प्रकाश शर्मा, डा. दिव्या तुलाचन, डा. नवीन ढकाल र सुजन खरेल सो हस्पिटलका लगानीकर्ता हुन् । लगानीकर्ताहरुको सो समूहलाई गैरेले हस्पिटलमा लगानी गर्न आग्रह गर्दै पटक–पटक झण्डै डेढ करोड रुपैयाँ लिएर शेयर कायम नगरी ठगी गरेको जिल्ला प्रशासन कार्यालय झापामा दर्ता भएको उजुरीमा जनाइएको छ । कूल ७५ लाख लगानी रहेको सो अस्पतालमा गैरे थप ७५ लाख रुपैयाँ लगानी गरेर आउन तयार भएपछि तत्कालीन शेयर होल्डरहरुले उनलाई स्वीकारेका थिए ।
झापाका प्रमुख जिल्ला अधिकारी शिवराम पोखरेलले भुसाल र गैरेबिरूद्ध परेको उजुरीमाथि कारबाही शुरू गरिएको बताए । ‘हामीले एक चरणको छलफल ग¥यौं, दुबैलाई सञ्चालकहरूको हिसाब–किताब बुझाइदिन भन्ने, अन्यथा आवश्यक कारबाही अघि बढाउने भनी इलाका प्रहरी कार्यालय दमकलाई लेखी पठाइएको छ’– पोखरेलले भने ।