बिर्तामोड ।
पर्यटन कार्यालय झापाले पर्यटन व्यवसायमा आबद्ध व्यवसायीको क्षमता विकास सम्बन्धी एक दिने प्रशिक्षण कार्यक्रम सम्पन्न गरेको छ ।
बिर्तामोडमा आयोजित प्रशिक्षण कार्यक्रममा होटल, ट्राभल्स, ट्रेकिङमा आबद्ध व्यवसायीहरुको सहभागिता रहेको थियो । पर्यटन कार्यालय झापाका प्रमुख छविलाल खतिवडा र बाल्मीकि एजुकेशन फाउन्डेशनका अध्यापक निरज श्रेष्ठले प्रशिक्षण दिएका थिए । प्रशिक्षण कार्यक्रममा झापाका ५० भन्दा बढी पर्यटन व्यवसायीको सहभागिता रहेको थियो ।
कार्यक्रमको उद्घाटन गर्दै प्रमुख अतिथि समेत रहेका बिर्तामोड नगरपालिकाका उपप्रमुख नगेन्द्र संग्रौलाले नेपालको पर्यटन विकासका लागि विभिन्न सम्पदाहरुको कोरिडोर निर्माण गर्नुपर्ने धारणा राखे । उनले पर्यटन विकासको लागि होटल, ट्राभल्स, ट्रेकिङमा आबद्ध व्यवसायीहरुको सरोकारवालाहरुसँग हातेमालो जरुरी हुने बताए ।
नेपालमा विविधतायुक्त हावापानी रहेको भन्दै संग्रौलाले त्यस्ता हावापानी भएका स्थान पर्यटकको रोजाइमा पर्ने भएकाले यसको प्रचारप्रसार गर्न आवश्यक रहेको बताए ।
नेपालमा हिमाल, पहाड र तराईजस्तो विविधतायुक्त भूगोल रहेको भन्दै १२ महिना नै यहाँ पर्यटनको सम्भावना रहने धारणा उनको थियो । होटल व्यवसायी संघ झापाका महासचिव शिवराज पौडेलले स्वागत गरेको कार्यक्रमको सञ्चालन पर्यटन कार्यालय झापाका सूचना अधिकारी निरज कट्टेलले गरेका थिए ।
कार्यक्रममा होटल व्यवसायी संघ कोशी प्रदेशका अध्यक्ष राजन दंगाल, झापा अध्यक्ष इन्दिरा श्रेष्ठ, नेपाल टुर्स एण्ड ट्राभल्स एशोसिएशन (नाट्टा) का कोशी प्रदेश महासचिव नवीन खरेल लगायतका सरोकारवालाको सहभागिता रहेको थियो ।
