योगेन्द्र योगी
काठमाडौँ :
अमेरिकी सेनाको कतारस्थित सेन्ट्रल कमान्डको हेडक्वार्टरमा इरानले गएराति १९ वटा मिसाइल हानेको छ।
आक्रमणपछि कतारका प्रधानमन्त्रीका सल्लाहकार तथा विदेश मन्त्रालयका प्रवक्ता डा. माजेद बिन मोहम्मद अल-अन्सारीले इरानी रिभोलुसनरी गार्डले अल-उदेइद एयर बेसलाई लक्षित गरी गरेको आक्रमणको कतारको कडा निन्दा व्यक्त गर्दै यसलाई कतार राज्यको सार्वभौमिकता, यसको हवाई क्षेत्र, अन्तर्राष्ट्रिय कानून र संयुक्त राष्ट्र संघको बडापत्रको स्पष्ट उल्लंघन भएको बताए।
डा. अल-अन्सारीले कतारको हवाई प्रतिरक्षाले आक्रमणलाई सफलतापूर्वक विफल पारेको र इरानी क्षेप्यास्त्रहरूलाई रोकेको बताए। उनले यस्ता उत्तेजक सैन्य कारबाहीहरूको निरन्तरताले यस क्षेत्रको सुरक्षा र स्थिरतालाई कमजोर बनाउने, अन्तर्राष्ट्रिय शान्ति र सुरक्षामा विनाशकारी परिणामहरू निम्त्याउन सक्ने परिस्थितिहरूमा तान्ने कुरामा पनि जोड दिए, सबै सैन्य कारबाहीहरू तुरुन्तै बन्द गर्न र वार्ताको टेबल र वार्तामा गम्भीर रूपमा फर्कन आह्वान गरे।
डा. अल-अन्सारीले कतार यस क्षेत्रमा इजरायली तनावको खतरा विरुद्ध चेतावनी दिने पहिलो देशहरू मध्ये एक भएको र कूटनीतिक समाधानलाई प्राथमिकता दिन निरन्तर आह्वान गर्दै आएको र असल छिमेकीपन र तनावबाट बच्नको महत्त्वमा जोड दिएको बताए। उनले वर्तमान संकटहरू पार गर्ने र क्षेत्रको सुरक्षा र यसका जनताको शान्ति सुनिश्चित गर्ने एक मात्र तरिका संवाद हो भन्ने कुरालाई पुनः पुष्टि गरे।
यस क्षेत्रमा तनावलाई ध्यानमा राख्दै स्थापित सुरक्षा र सावधानीका उपायहरू अपनाएर पहिले नै बेस खाली गराइएको बताए। कतारी सशस्त्र बलका सदस्यहरू, मैत्रीपूर्ण सेनाहरू र अन्य लगायत बेसमा रहेका कर्मचारीहरूको सुरक्षा सुनिश्चित गर्न सबै आवश्यक कदम चालिएको र आक्रमणबाट कुनै पनि घाइते वा मानवीय क्षति नभएको पुष्टि गरे।
नेपाली दूतावासको आग्रह : आधिकारिक सूचना र निर्देशन पालना गर्नु
कतारस्थित नेपाली दूतावासले पनि मध्य राती एक बिज्ञप्ति जारी गर्दै वर्तमान परिस्थितिलाई मध्यनजर गर्दै कतारमा रहेका नेपाली दाजुभाइ दिदीबहिनीहरूलाई सतर्क रहन र यथास्थानमै रहन आग्रह गरेको छ ।
‘कृपया शान्तपूर्वक रहन र कतार सरकारको आधिकारिक सूचना र निर्देशन पालना गर्न अनुरोध गर्दछौँ’ दूतावासले जारी गरेको विज्ञप्तिमा भनिएको छ । संखुवासभा समाज कतारका अध्यक्ष राजेन्द्र खनालले पनि इरानले कतारस्थित सेन्ट्रल कमान्डको हेडक्वार्टरमा मिसाइल हानेको भएपनि सबै आकासमै निष्तेज पारेको आफूहरुले देखेको बताए।
अहिले कतार कुनै खतरा नरहेको बताउदै अध्यक्ष खनालले कतार सरकारले जारी गरेको सुरक्षाका उपायहरु पालना गर्न अनुरोध गरेका छन्। गैरआवासीय नेपाली संघ(एनआरएनए) ले पनि हाल ईरान–इजरायलबीचको बढ्दो तनावको जोखिमका कारण कतार लगायत मध्यपूर्व क्षेत्रको समग्र सुरक्षा अवस्था असामान्य र संवेदनशील बनेको जनाएको छ । यो स्थिति अझै अप्ठ्यारो बन्न सक्ने सम्भावना रहेकाले, एनआरएनएले सम्पूर्ण नेपाली समुदायको सुरक्षालाई उच्च प्राथमिकता दिँदै यस्तो अनुरोध गरेको छ।
सुरक्षाका लागि तपाईंले अपनाउनुपर्ने उपायहरू:
-सुरक्षित स्थानमा रहनुहोस् – भिडभाड भएका सार्वजनिक स्थलहरूमा जानबाट यथासम्भव टाढा रहनुहोस्।
-सम्पर्कमा रहनुहोस् – आफ्नो परिवार, साथी तथा नियोग (एनआरएनए, नेपाली दूतावास, स्थानीय संस्थाहरू) सँग निरन्तर सम्पर्कमा रहनुहोस्।
-स्थानीय सुरक्षा निर्देशन पालना गर्नुहोस् – सरकारले जारी गर्ने सूचना, निषेधाज्ञा, वा सुरक्षासम्बन्धी आदेशलाई प्राथमिकताका साथ पालना गर्नुहोस्।
-आपतकालीन तयारी राख्नुहोस् – राहदानी, परिचयपत्र, मोबाइल चार्जर, आवश्यक औषधि, खानेकुरा र पानीजस्ता सामग्री सधैं साथमा राख्नुहोस्।
-दूतावास तथा NRNA सञ्जालको सम्पर्क राख्नुहोस् – कुनै पनि आकस्मिक वा विषम परिस्थितिमा तुरुन्तै गैरआवासीय नेपाली संघ (NRNA) को एन सी सी वा नेपाली दूतावासमा सम्पर्क गर्नुहोस्।
-गैरआवासीय नेपाली संघ (एनआरएनए) को हटलाइन 9801861123/9801861106 र 9801861100 नम्बरमा सम्पर्क गर्नुहोस्।
