बिर्तामोड ।
झापाको बिर्तामोडमा मुख्य कार्यालय रहेको सिम्रिक बचत तथा ऋण सहकारी संस्थाले गौरादह सेवाकेन्द्रमा सहकारी सदस्य शिक्षा तालिम सम्पन्न गरेको छ ।
शिक्षा तथा तालिम उपसमितिका संयोजक एवम् संस्थाका सचिव सुवास भट्टराईको अध्यक्षता तथा नेफ्स्कुनका सञ्चालक सदस्य तथा झापा जिल्ला बचत तथा ऋण सहकारी संघका अध्यक्ष घनश्याम अधिकारीको प्रमुख आतिथ्यमा भएको कार्यक्रममा शिक्षा तथा तालिम उपसमितिका सदस्य गणेश सुवेदीले स्वागत गरेका थिए ।
नेफ्स्कुनका सञ्चालक सदस्य तथा झापा जिल्ला बचत तथा ऋण सहकारी संघका अध्यक्ष घनश्याम अधिकारीको प्रमुख प्रशिक्षकत्वमा भएको तालिममा एक सय जना भन्दा बढी शेयर सदस्यहरुको सहभागिता रहेको थियो ।
तालिमका मुख्य प्रशिक्षक अधिकारीले बचत गर्नुका फाइदा , सहकारीमा शेयर सदस्यको भूमिका लगायतका विषयमा तालिमका सहभागिलाई जानकारी गराएका थिए ।
कार्यक्रममा संस्थाका अध्यक्ष कमलबहादुर बस्नेतले संस्थाको आन्तरिक गतिविधि, वित्तीय विवरण, चालू वर्षका लागि साधारणसभाले पारित गरेका कार्यक्रमहरु एवम् संस्थाको भावी लक्ष्यका बारेमा प्रकाश पारेका थिए ।
सिद्धार्थ वैंक गौरादह शाखा प्रमुख नुतन गिरीलगायतले शुभकामना मन्तव्य राखेको कार्यक्रमको सञ्चालन संस्थाका तालिम विभाग प्रमुख विजय बस्नेतले गरेका थिए ।
