बिर्तामोड ।
झापाको हल्दिबारीमा आगलागीबाट एउटा घर जलेर नष्ट भएको छ ।
आगलागीबाट करिब १२ लाख बराबरको क्षति भएको प्रहरीले जनाएको छ । हल्दिबारी गाउँपालिका–३ रमाइलो चोक निवासी ताराबल्लब गिरीको काठको घरमा भएको आगलागीबाट घर पूर्ण रूपले जलेर नष्ट भएको हो ।
घरमा भएको अन्नपात, लत्ताकपडा, फर्निचरलगायत नष्ट भएको छ भने ९ वटा खसी बाख्रा जलेर मरेको जिल्ला प्रहरी कार्यालय झापाले जनाएको छ । भद्रपुर र मेचीनगरबाट आएका दमकल, स्थानीयबासी र प्रहरीको सहयोगमा आगो नियन्त्रणमा आएको थियो ।
आगलागीको कारण थाहा हुन नसकेको प्रहरीले जनाएको छ ।
