नयाँ नम्बरबाट फोन र नयाँ ’आइडी’बाट मेल आउँछ ? सावधान !

0
36

झापा।

तपाईंलाई कुनै नयाँ खालको नम्बरबाट फोन आउने गरेको छ ? वा कुनै नयाँ इमेल आइडीबाट प्रलोभन दिने खालका सन्देशहरू आइरहेका छन् ? यदि आइरहेका छ भने सावधान ! त्यस्ता इमेल वा नम्बरबाट आएका सन्देश तथा कुराकानीमा विश्वास नगर्नुहोला । त्यसले तपाईंलाई घरबारविहीनसमेत बनाउनसक्छ ।

नेपाल प्रहरी, साइबर ब्यूरोका प्रवक्ता, प्रहरी उपरीक्षक दीपकराज अवस्थी त्यसरी आएको फोन उठाउन र त्यस्ता इमेलको विश्वास नगर्न तथा प्रतिक्रिया नदिन आग्रह गरे । त्यसरी अपरिचित व्यक्तिले भनेका तथा अपरिचित इमेलबाट आएका सन्देशको भर पर्दा र प्रतिक्रिया जनाउँदा मानिसहरू ठगिएकाले यसतर्फ विशेष सावधानी अपनाउन उनले आग्रह गरेका हुन् ।

प्रहरी उपरीक्षक अवस्थीले पछिल्लो समय साइबर ब्यूरोलगायत नेपाल प्रहरीका विशिष्टीकृत कार्यालयहरू र नेपाल प्रहरीकै उच्च अधिकारीहरूको नाम तथा दर्जा प्रयोग गरी विभिन्न व्यक्तिहरूलाई चेतावनीयुक्त इमेलहरू प्राप्त भएको जस्ता गुनासाहरू नेपाल प्रहरी प्रधान कार्यालय, साइबर ब्यूरोमा प्राप्त भएकाले यसतर्फ ब्यूरोको समेत गम्भीर ध्यानाकर्षण भएको बताए । उनले भने–“नेपाल प्रहरी साइबर ब्यूरोलगायत अन्य प्रहरी कार्यालयहरूबाट पठाइएको भनिएका यस्ता इमेलहरू नक्कली भएकाले यस प्रकृतिका मेलहरूको विश्वास नगर्न साथै कुनै प्रतिक्रिया नदिन सम्पूर्ण महानुभावहरूमा विनम्र अनुरोध छ ।”

त्यसरी आएका इमेलका सम्बन्धमा आवश्यक अनुसन्धान भइरहेको तथा कुनै शङ्का लागेमा ब्यूरोको आधिकारिक वेबसाइट cyberbureau.nepalpolice.gov.np मा रहेका सम्पर्क नम्बरहरू र इमेलमार्फत जानकारी गराउन सबैमा अनुरोध गरिएको छ ।

ब्यूरोले एक सार्वजनिक सूचना जारी गरेर त्यस्ता गतिविधिप्रति सचेत हुन र कुनै शङ्का लागेमा नजिकका प्रहरीमा जानकारी गराउन अनुरोध पनि गरेको छ । साइबर ब्युरोले प्रविधिको दुरुपयोग गरी ठगी गर्ने कार्य बढेको भन्दै सचेत रहन सर्वसाधारणलाई आग्रह गरेको छ । विगत केही समयदेखि व्यक्ति तथा आपराधिक समूहले प्रविधिको दुरुपयोग गरी सामाजिक सञ्जाल मार्फत विभिन्न प्रवृत्ति अपनाउँदै ठगी गर्ने कार्य दिन प्रतिदिन बढेको पाइएको भन्दै सजग रहन सबैमा अनुरोध गरेको हो ।

ब्युरोका अनुसार अनलाइनमा मात्रै चिनजान भएको साथीले गिफ्ट पठाइदिने भनी प्रलोभनमा पार्ने र उक्त गिफ्ट प्राप्त गर्न ट्याक्स क्लिअरेन्स गर्नुपर्ने बाहाना बनाई रकम माग हुने गरेको छ । यस्तै चिठ्ठा परेको र उक्त चिठ्ठा प्राप्त गर्नको लागि ट्याक्स क्लिअरेन्सको बाहाना बनाई रकम माग गर्ने गरेको पाइएको पनि ब्युरोको भनाइ छ । त्यस्तै सामाजिक सञ्जाल ह्याक गरी प्रयोगकर्ताका निकटतम साथीसँग रकम माग गर्ने, जरुरी कोड नम्बर पठाएको छु भनी वान टाइम पासवर्ड (ओपीटी)माग गरी सम्बन्धित खातावालाको खाताबाट रकम निकाल्ने जस्ता कार्य हुने गरेको पाइएको पनि ब्युरोले जनाएको छ ।

अनलाइनमा सस्तोमा सामान बिक्रीमा राख्ने र समान पठाउनु पहिले नै रकम असुल गरी आपूर्ति नगरेको ठगी गर्ने गरेको पाइएको पनि ब्युरोले जनाएको छ । यस्तै सामाजिक सञ्जाल मार्फत प्रेमजालमा पारी ठगी गर्ने, भिडियो भाइरल गरिदिने भनी रकम माग गर्ने, क्रिप्टोकरेन्सीको नाममा ठगी गर्ने जस्ता कार्य समेत भएको पाइएकाले ब्युरोले सामाजिक सञ्जालको यही सदुपयोग गर्दै सचेत रहन अनुरोध गरेको छ । पछिल्लो समय झापासहित देशका विभिन्न स्थानमा आफु आनलाइनको माध्यमबाट ठगीमा परेको भन्दै दिनहुँ उजुरी पर्ने गरेको प्रहरी उच्च स्रोतले जनाएको छ ।

अनलााईन प्रविधिको प्रयोग गर्दै महिलाको चरित्र हत्या गर्नेदेखि अनलाइन मार्फत विभिन्न चिठ्ठा परेको भन्दै रकम गठी गर्ने गिरोह नै सक्रिय रहेकाले यस्ता विषयमा सचेत बन्न प्रहरीले आग्रह गरेको छ । यसैबीच विभिन्न युरोपियन मुलुक तथा अमेरिका लगायतका देशहरुमा अध्धयनसंगै राम्रो आाम्दानी तथा पिआरको लोभ देखाएर सामाजिक सञ्जाल फेसबुक, टिकटक, इनस्ट्राग्राम लगायतहरुको प्रयोग गरेर ठगी गर्नेहरु पनि बढ्दै गएकाले सचेत बन्न साइवर ब्युरोले आग्रह गरेको छ ।

LEAVE A REPLY

Please enter your comment!
Please enter your name here