बिर्तामोड,
करिव नौ करोड मूल्य पर्ने बिर्तामोड नगरपालिका १ स्थिति पाथीभर सिने प्लाजा नजिकैको सात कठ्ठा जमिनको कित्ता नम्वर नै हेरफेर गरेर जी ट्रेडिङ प्रालि ललितपुरले ४ करोड २५ लाख रुपैयाँमा सो जग्गा खरिद गरेको खुलेको छ ।
हाल दमक नगरपालिका १० बसोवास गर्दै आएकी ६४ वर्षीय नर्वदा चौहान, घनेन्द्र देवी थापाको नामबाट प्रालिले सो जमिन खरिद गरेको खुलेको हो ।
२०७७ साल साउन ८ गते दर्ता रहेको प्रालिले २०७७ कात्तिक ३ गते जग्गा खरिद गरेको जग्गाधनी दर्ता प्रमाण – पूर्जामा उल्लेख छ । भूमिसुधार तथा मालपोत कार्यालय झापाबाट साविक कित्ता नम्वर ६२२ ललितपूर महानगरपालिकामा दर्ता रहेको जी टे«डिङ प्रालिले खरिद गरेको खुलेको हो । प्रालि हेमराज गौतमको नाममा एकलौटी दर्ता रहेको रहेकोछ ।
२०४६ सालमा विष्णु प्रसाद खतिवडाका नाममा कित्ता नम्वर ६२२ भएको सो जमिन घनेन्द्र देवी थापा र नवर्दा चौहानले यस अघि खरिद गरेको र उनीहरुबाट पनि जी टे«डिङ प्रालिले उक्त जग्गा खरिद गरेको भूमिसुधार तथा मालपोत कार्यालय झापाले जनाएको छ । कार्यालयका नावय सुब्बा द्वारा हस्ताक्षर गरेको पत्रमा झापा जिल्ला चारपाने १ को कित्ता नम्वर ६२२ को जग्गा झापा जिल्ला बन क्षेत्र सुद्धिकरण उच्च स्तरीय आयोगको २०४६ वाट विष्णु प्रसाद खतिवडाको नाममा दर्ता भई र न. ८५१२ मिति २०४७ जेठ २१ को लिखतबाट क्रमशः घनेन्द्र देवी थापा र नर्वदा चौहान खरिद गरेको र र .न. १७२३ ‘ख’ मिति २०७७÷०७÷०३ को लिखतबाट जी टे«डिङ प्रालिले खरिद गरेको देखिन्छ ।
मालपोत कार्यालय झापाको २०७७ साल कात्तिक २१ गतेको पत्रमा झापा जिल्ला बन क्षेत्र सुद्धिकरण उच्च स्तरीय आयोगको च. नं.१२९६ मिति २०४६ असार १६ को पत्र अनुसार विष्णु प्रसाद खतिवडाको नाममा दर्ता भएको उल्लेख छ ।
अचम्मको कुरा त के छ भने घनेन्द्र कुमारी थापा र नर्वदा चौहानले घर बाटो सिफारिस गरी पाउँ भनी बिर्तामोड नगरपालिका वडा नम्वर १ मा दिएको निवेदन उपर वडा कार्यालयले कित्ता नम्वर ६२२ मा घर नभएको र पक्का वाटो २० फुटे छ भन्दै प्रमाणित गर्नुले पनि वडा कार्यालय देखि नै मालपोत र नापी कार्यालयका कर्मचारीको समेत मिलेमत्तो हुन सक्ने आशंका गर्न सकिन्छ । किनकि सो ठाउँमा चार तल्लेसम्म घर निर्माण भएका छन् ।
धन देखेपछि महादेवका पनि त्रिनेत्र खुल्छ भनेझैं यहाँको जग्गाको किनवेचका लागि क– कस्का नेत्र खुलेका छन् अनुसन्धानले देखाउला ।
तर, सो जग्गाको विषय सतहमा आएपछि नापी कार्यालय झापाले अहिले पत्रचार गर्दै आ– आफ्नो जग्गाको प्रमाण– पूर्जा लिएर सबैलाई कार्यालयमा आउन भनेको छ । कार्यालयका प्रमुख नापी अधिकृत डिल्लीराज भण्डारीले नापी विभाग सहित जिल्ला प्रशासन कार्यालय झापा, जिल्ला प्रहरी कार्यालय झापा, भूमिसुधार तथा मालपोत कार्यालय , बिर्तामोड नगरपालिका र बिर्तामोड वडा नम्वर १ को कार्यालयलाई आवश्यक सहयोग गरिदिन अनुरोध सहित वोदार्थ पठाएका छन् ।
यसैबीच, बिर्तामोड नगरपालिकाले नापी शाखामा उक्त नक्साको कित्ता फेरबदल गर्ने कर्मचारीलाई कारबाही गर्न पत्र पठाएको छ ।
पुराना र प्रमाणित नक्सा सामेल गरी ५४७ कित्ता नम्बर कायम गर्न सिफारिस गरिएको छ । कित्ता नम्वर ५४७ लाई कित्ता नम्वर ६२२ वनाएर विक्री गरेपछि जग्गाको किचलो सुरु भएको हो ।
