योगेन्द्र योगी
बिराटनगर,
साउदी अरेबिया गैरकानुनी कामदार माथि धडपकड तीव्र पारेसँगै दैनिक हजारौ कामदार पक्राउ परेका छन्। साउदीको आन्तरिक मन्त्रालयले अप्रिल २४ देखि ३० सम्म साउदी अरबभरि आवास, श्रम र सीमा सुरक्षा कानूनको पालना सुनिश्चित गर्न निरीक्षण अभियान सञ्चालन गरेर १७ हजार १५३ जनालाई पक्राउ गरेको छ।
मन्त्रालयका अनुसार पक्राउ पर्नेहरूमा १०,३०५ जना रेसिडेन्सी कानून उल्लङ्घन गर्ने, ३,६४४ जना सीमा सुरक्षा कानून उल्लङ्घन गर्ने र ३,२०४ जना श्रम कानून उल्लङ्घन गर्नेहरू थिए। राज्यमा सीमा पार गर्ने प्रयास गर्दा पक्राउ परेका व्यक्तिहरूको कुल संख्या १,१०९ थियो, जसमध्ये ३५ प्रतिशत यमनी नागरिक, ६२ प्रतिशत इथियोपियाली नागरिक र तीन प्रतिशत अन्य राष्ट्रियताका थिए। उल्लंघन गर्नेहरूलाई यातायात, आश्रय र रोजगारी प्रदान गर्ने लगभग १३ जनालाई पनि पक्राउ गरिएको जनाएको छ।
मन्त्रालयले गैरकानुनी सीमा नाकाबाट सहजीकरण गर्ने वा सहभागी गराउने व्यक्तिलाई कडा कारबाही गर्नुपर्नेमा जोड दिएको छ । यी दण्डहरूमा १५ वर्षसम्मको जेल सजाय, १० लाख रियालसम्मको जरिवाना र यी अपराधमा प्रयोग हुने सवारी साधन र सम्पत्ति जफत गर्ने व्यवस्था छ।
देशका सुरक्षा बलहरूद्वारा गरिएको क्र्याकडाउनले राज्यका सबै क्षेत्रहरूमा कानुन उल्लङ्घन गर्नेहरूलाई पक्राउ गरी कानुनी कारबाही गर्ने कार्य तीब्र रुपमा अघि बढाईएको छ। उनीहरूले जनतालाई राज्यभरि तोकिएको आपतकालीन सम्पर्कहरू मार्फत कुनै पनि संदिग्ध उल्लङ्घनको रिपोर्ट गर्न आग्रह गरेको छ।
पछिल्लो समय साउदीले भिसाको म्याद सकिएर लुकिछिपी बस्ने आप्रबासीलाई लक्षित गरि धड्पड अभियान तीब्र पारेसंगै गैरकानुनी रुपमा त्यहाँ कार्यरत सयौ नेपालीहरु पनि पक्राउ परेका र हाल उनीहरुलाई जेलमा राखिएको र जेल अवधि समाप्त गरेपछि आवश्य कानुनी प्रक्रिया पूरा गरी डिपोर्ट गर्ने गरेको छ ।
३१ नेपालीलाई एक्जिट भिसा
साउदीमा गैरकानुनी रुपमा बसोबास गर्दै आएका ३१ नेपालीले ‘एक्जिट भिसा’ (बहिर्गमन भिसा) पाएका छन् । साउदीको रियाद र दमामबाट गरी ३१ जना नेपालीले एक्जिट भिसा पाएको रियादस्थित नेपाली दूतावासले जनाएको छ।
दूतावासका अनुसार साउदी अरेबियाका विभिन्न कम्पनी तथा प्रतिष्ठानहरुमा कार्यरत रहँदा साउदी आवासीय अनुमति पत्र (इकामा) नवनाईएका वा नवीकरण नगरिएका वा हुरूब लगाइएका नेपालीहरुलाई स्वदेश फर्काउन आवश्यक बहिर्गमन भिसाका लागि सम्बन्धित साउदी निकायमा अनुरोध गरिएको थियो ।
गैरकानुनी रूपमा साउदीमा रहेका आप्रवासी कामदार स्वदेश फर्कनु परे अनिवार्य रूपमा एक्जिट भिसा आवश्यक पर्छ । एक्जिट भिसा नभएसम्म कामदार स्वदेश फर्कन पाउँदैनन् । सम्बन्धित देशको दूतावासले अनुरोध गरेपछि साउदी सरकारले एक्जिट भिसा उपलब्ध गराउने गर्छ ।
साउदीमा कार्यरत नेपालीहरूले आवासीय अनुमति पत्र (इकामा) नबनाएका तथा नवीकरण नगरेकाहरूले स्वदेश फर्किन बहिर्गमन भिसा आवश्यक पर्छ । त्यसका लागि आवश्यक कागजात सहित दूतावासमा सम्पर्क गर्नुपर्छ । एक्जिट भिसा लागेको ६० दिनभित्र साउदी छोड्नुपर्ने कानुनी व्यवस्था छ । एक्जिट भिसाको प्रोसेस निःशुल्क हुने दूतावासले जनाएको छ ।
