अर्जुनधारा।
झापाको अर्जुनधारा–१ सिस्नेमा जारी प्रथम शहीद टेक–मान स्मृति प्रदेशस्तरिय नकआउट फुटबल प्रतियोगिता अन्तर्गत आइतबार सम्पन्न खेलमा आयोजक सयपत्री युवा समूह विजयी भएको छ ।
शहीद टेक–मान रंगशालामा टाँडी युवा क्लब मोरङलाई २–१ गोलअन्तरले पराजित गर्दै आयोजक विजयी भएको हो । जीतसँगै आयोजक सेमीफाइनल पुग्ने तेस्रो टोली भएको छ ।
खेल शुरु भएको १४औं मिनेटमा अनिल तामाङले गोल गर्दै टाँडीका लागि अग्रता दिलाएका थिए । तर, आयोजकका तर्फबाट बबिन बोहोराले १६औँ मिनेटमा गोल गरेर खेललाई बराबरीमा पुराएका थिए । बबिनले नै ४६औँ मिनेटमा व्यक्तिगत दोस्रो गोल गरे टिमलाई विजयी बनाए ।
खेलको म्यान अफ दी म्याच दुई गोल गरेका आयोजकका बबिन बोहोरा घोषित भए । उनलाई आयोजक समितिका अध्यक्ष कृष्ण लोहार, झापा ११ एफसीका महासचिव केशवराज दाहाल, आर्थिक उपसमितिका संयोजक पवन खनाललगायतले संयुक्तरुपमा नगद ३ हजार पुरस्कार प्रदान गरे ।
सोमबारको खेल रोलिङ क्लब धुलाबारी र शिवसताक्षी युवा क्लब झिलझिलेबीच खेल हुने प्रचार प्रसार उपसमितिका संयोजक डिबी दर्नालले बताए ।
