सुरुङ्गा।
नेपाल राष्ट्रिय शिक्षक सङ्गठन कोशी प्रदेशको दोस्रो अधिवेशनबाट नयाँ नेतृत्व चयन भएको छ ।
बिराटनगरस्थित कञ्चनजङ्घा पार्टी प्यालेस पाञ्चालीमा भएको पुस १३ र १४ गते सम्पन्न द्विदिवसीय अधिवेशनबाट सर्वसम्मत रूपमा महेन्द्रप्रकाश गौतम (ताप्लेजुङ) को अध्यक्षतामा ३५ सदस्यीय प्रदेश समिति गठन गरिएको छ ।
समितिको महिला उपाध्यक्षमा अम्बिका खवास बाँस्तोला (झापा), समावेशी उपाध्यक्षमा गोविन्दमान तामाङ (संखुवासभा) र अन्य उपाध्यक्ष पदमा कुमार पराजुली (खोटाङ ) लाई निर्वाचित गरिएको छ । त्यसै गरी, महासचिवमा दिलबहादुर फुयाँल (उदयपुर), उपमहासचिवमा हरिप्रसाद धिमाल (मोरङ), सचिवमा गङ्गा तिम्सिना (इलाम), कोषाध्यक्षमा प्रभुनारायण चौधरी (सुनसरी) र सहकोषाध्यक्षमा करिष्मा श्रेष्ठ (भोजपुर) लाई चयन गरिएको छ ।
समितिको सदस्यमा बालकुमार रेग्मी, रीता श्रेष्ठ, गणेशप्रसाद आचार्य, छबिलाल धमला, धनप्रसाद गेलाल, हरिप्रसाद पौडेल, दुर्गाप्रसाद खतिवडा, दीपेन्द्रप्रसाद घिमिरे, किशोरकुमार खत्री, किरणबहादुर राई, केशरकुमार राई, दिनेश खडका, बिमला मिश्र, मन्दिरा सुवेदी, कविता शर्मा, बिमला राई, मनमाया रिजाल, जमुना राई, राजेन्द्रकुमार राई, मित्रबहादुर नेपाली, डुबानाथ दुलाल, गीता खत्री, अनिता तुम्बाहाम्फे, लक्ष्मीप्रसाद भट्टराई रहेका छन् ।
त्यसै गरी, अधिवेशनले ३ वर्षे कार्यकालका लागि सोमनाथ बराल, धनबहादुर थापा र बालकृष्ण लुइँटेल रहेको ३ सदस्यीय लेखा परीक्षण समिति चयन गरेको थियो । अधिवेशनले रघुनाथ मिश्र र रामबहादुर बिष्टलाई राष्ट्रिय महाधिवेशन प्रतिनिधिमा चयन गरेको छ ।
बन्द सत्र सञ्चालन गर्न र नयाँ समिति चयनका लागि राष्ट्रिय उपाध्यक्ष सूर्यबहादुर दाहालको अध्यक्षतामा नारायणप्रसाद गौतम, धर्मानन्द खरेल, बुद्धिमान कार्की, यदु सुवाल, रीता पाठक र राजाराम राई रहेको ७ सदस्यीय अध्यक्ष मण्डल र अधिवक्ता नारायण वस्तीको संयोजकत्वमा युगेश्वर मेहता र किशोर आचार्य रहेको ३ सदस्यीय निर्वाचन मण्डलले भूमिका खेलेको थियो ।
अधिवेशनमा कोशी प्रदेशका १४ जिल्लाका १ सय ३७ पालिकाबाट ५ सय १० प्रतिनिधि शिक्षकहरूको सहभागिता रहेको थियोे । बन्द सत्रमा प्रदेश समिति सचिव रघुनाथ मिश्रले साङ्गठनिक प्रतिवेदन, महिला उपाध्यक्ष सरिता तामाङले महिला विभागको प्रतिवेदन र कोषाध्यक्ष मेघनाथ घिमिरेले आर्थिक प्रतिवेदनहरु प्रस्तुत गरेका थिए, जसलाई संशोधनसहित पारित गरिएको थियो ।
सो अवसरमा स्थानीय तहले प्रअ नियुक्ति, शिक्षक नियुक्ति, सरुवा, बढुवा लगायतका विषयमा दिने गरेको दुःख र हस्तक्षेप बन्द हुुनुपर्ने, शिक्षक र विद्यालय कर्मचारीले १० देखि ४ बजेको समयलाई कर्तव्यनिष्ठ भई विशुद्ध शैक्षिक तथा शैक्षणिक कार्यमा लगाउनुपर्ने लगायतका विषय समावेश गरिएको ४५ बुँदे बिराटनगर घोषणापत्र–२०८० जारी गरिएको थियोे ।
