पूर्वाञ्चलमा पत्रकारको चुनाव

राज्यको चौथो अंगको रुपमा प्रतिष्ठापित पत्रकारिता क्षेत्रको महत्व दिनप्रतिदिन बढ्दै गएको अहिलेको परिप्रेक्ष्यमा सञ्चारमाध्यमहरुमा पनि नयाँ–नयाँ प्रविधि भित्रिएर ‘ग्लोबल भिलेज’को अवधारणा स्थापित भइसकेको छ । विश्व एउटै घर भन्ने नाराका साथ स्थापित यस अवधारणामा संसारको जुनसुकै कुनामा भएका घटनापनि क्षणमै जहाँसुकै थाह पाउन सकिने सञ्चारमाध्यमको विकासले वास्तवमै संसारलाई एउटै घर बनाइसकेको छ । त्यसैले सञ्चार क्षेत्रमा कार्यरत सञ्चारकर्मीहरुको काम र महत्वपनि बढ्दै गइरहेको छ ।
नेपालमा सन्त नेता कृष्णप्रसाद भट्टराईको अध्यक्षतामा गठन भएको नेपाल पत्रकार संघ अहिले देशभरीका सम्पूर्ण पत्रकारहरुको छाता संगठनको रुपमा महासंघ भएको छ । र, यसको कार्यक्रमहरु मध्ये पत्रकारहरुको बृत्तिविकास र पत्रकारितालाई संस्थागत तथा व्यवसायिक बनाउनमा सहयोग पु¥याउँदै सम्पूर्ण सञ्चारमाध्यमका सहकर्मीहरुलाई एक जुट बनाइ अगाडि बढाउनु रहेको छ । यसैक्रममा महासंघको वर्तमान कार्यसमितिहरुको विधान अनुसारको कार्यावधि सकिएर नयाँ कार्यसमिति निर्माणका लागि लोकतान्त्रिक पद्धति अनुसार विभिन्न जिल्लामा हुने शाखा अधिवेशनको माध्यमबाट निर्वाचन भइरहेका छन् ।
यसैसन्दर्भमा नेपाल पत्रकार महासंघको केन्द्रीय पदाधिकारीहरुको रोहबरमा पूर्वाञ्चलका केही जिल्लाहरुमा अधिवेशन सम्पन्न भइ निर्वाचन पनि भइसकेको छ । नेपाल प्रेस युनियन, प्रेस चौतारी नेपाल, क्रान्तिकारी पत्रकार संघ, आदिवासी जनजाति पत्रकार संघ, ड्यास क्रान्तिकारी पत्रकार संघ, फोनिज लगायत विभिन्न पत्रकार संघहरु निर्वाचनमा सहभागी भइ निर्वाचित पनि भइसकेका छन् । पेशागत हकहित र पेशाको मर्यादा बढाउनका लागि निर्वाचित पत्रकार प्रतिनिधिहरुले निर्वाचनका बेला भएको प्रतिस्पर्धालाई स्वस्थ रुपले सहज ढंगबाट स्वीकार गरी भावी कार्यक्रम बनाइ अगाडि बढ्नुपर्ने दायित्व रहेको छ ।
पत्रकारिता उच्छृंखल र मर्यादाहीन भयो भने सञ्चार क्षेत्रमा गलत प्रवृत्ति हावी हुने निश्चित छ । त्यसैले स्वस्थ पत्रकारिताको विकासका लागि निर्वाचित प्रतिनिधिहरुले आफ्ना कार्ययोजना बनाउनुपर्ने र त्यसलाई दृढतापूर्वक लागू गराउनुपर्ने दायित्वबोध निर्वाह गर्नुपर्छ । पूर्वाञ्चल क्षेत्रका पत्रकार महासंघका नवनिर्वाचित पदाधिकारीहरुलाई आफ्नो तीन बर्षे कार्यकाल सफलतापूर्वक सम्पन्न गर्न र आगामी राष्ट्रिय महाधिवेशनलाई सफल बनाई नयाँ नेतृत्व चुनाव गर्न प्रेरणा मिलोस् भन्ने हार्दिक शुभकामना ।