काँकरभिट्टा ।
झापाको कांकरभिट्टाबाट बिस्कुटको प्याकेटभित्र ब्राउन सुगर लुकाएर ल्याउँदै गर्दा दुई जना मेची पुलबाट पक्राउ परेका छन् ।
काँकरभिट्टास्थित पुरानो मेची पुलमा भारतको पानीट्याङ्कीबाट सिटी सफारीमा काँकरभिट्टातर्फ आउँदै गरेका पाँचथर मिक्लाजुङ गाउँपालिका– ४ रवि बस्ने ३१ वर्षीय दिलप्रसाद राई र सोही पालिका– ५ स्थायी ठेगाना भई हाल दमक–२ हिमालय टोलमा डेरा गरी बस्ने २९ वर्षीया स्मारिका नेम्बाङ ब्राउन सुगरसहित पक्राउ परेका हुन् ।
उनीहरूले झोलामा पतञ्जली दूध लेखिएको बिस्कुटको प्याकेटभित्र लुकाएर ब्राउन सुगर ल्याएका थिए । प्लास्टिकबाहेक ४ ग्राम ब्राउन सुगरसहित दुवैलाई आवश्यक कारबाहीको लागि इलाका प्रहरी कार्यालय काँकरभिट्टामा राखिएको जिल्ला प्रहरी कार्यालयले जनाएको छ ।
