शनिश्चरे ।
झापाको अर्जुनधारा –८ शनिश्चरेमा साहित्य सङ्गीत र पत्रकारिता क्षेत्रमा क्रियाशील तीनजना सर्जक प्रतिभालाई सम्मान गरिएको छ ।
आज (विहिवार) ज्येष्ठ नागरिक सामुदायिक मिलन समाज अर्जुनधारा नगरसमितिको आयोजनामा आयोजित कार्यक्रममा साहित्य सर्जक मनबहादुर लिम्बू (अभागी ठेगुवा), पत्रकारिता तर्फ आमसंचार डटकमका सञ्चालक समाचार प्रमुख बिनोद पाण्डे, सङ्गीत तर्फ कमला नेम्वाङलाई सम्मान तथा पुरस्कृत गरिएको हो ।
सोही कार्यक्रममा वडा नम्बर ८ को तर्फबाट शिक्षा क्षेत्रमा विज्ञान विषयमा ३. ९० प्रतिशत अङ्क ल्याएर कोशी प्रदेश उत्कृष्ट बन्न सफल सागर रेग्मीलाई सम्मान गरिएको छ । समाजलाई माइक सौजन्य प्रदान गर्ने इनरहुइल क्लब अर्जुनधारालाई पनि कदरपत्र प्रदान गरिएको थियो ।
कार्यक्रममा प्रमुख अतिथि अर्जुनधारा नगरपालिका वडा नम्बर ८ का वडाध्यक्ष कुमार उप्रेतीले प्रमाण पत्र, दोसल्लाद्वारा सम्मान गरेका थिए । महाकवि लक्ष्मीप्रसाद देवकोटाको ११६ औं जन्म जयन्ती तथा २०८१ सालको लक्ष्मीपूजाको पावन दिनमा २०७० साल देखि आयोजना हुँदै आएको साहित्य तथा सम्मान कार्यक्रम अन्तरगत यस वर्षको कार्यक्रममा महाकविको जीवन चर्चा, कविता वाचन र मौलिक नृत्यहरू प्रस्तुत गरिएको थियो ।
समाजका अध्यक्ष रामप्रसाद भट्टराईको सभा अध्यक्षतामा आयोजित कार्यक्रममा वरिष्ठ उपाध्यक्ष हरिप्रसाद मिश्रले स्वागत र कोषाध्यक्ष कृष्णप्रसाद पौडलले कार्यक्रम सञ्चालन गरेका थिए । सम्मानितहरूको परिचय समाजका सचिव शेखरनाथ अधिकारीले गराएका थिए ।
सम्मानित व्यक्ति छनौट समितिमा समाजका हस्त परियार, हरि काफ्ले र कृष्ण पौडेल रहेका थिए ।
