दबाब सहन नसकेर आत्महत्या गरेको आरोप

0
14

भद्रपुर ।

मेलमिलाप समितिको दबाब सहन नसकेर भद्रपुरमा एक व्यक्तिले आत्महत्या गरेका छन् ।

भद्रपुर नगरपालिका –८ नम्बर वडा कार्यालयमा गठित मेलमिलाप समितिका पदाधिकारीहरूले अविवाहित तथा मानसिक सन्तुलन ठीक नभएकी एक गर्भवतीलाई जबरजस्ती जिम्मा लगाउन खोज्दा भद्रपुर –८ स्थित भद्रशिव मन्दिर नजिकै बसोबास गर्ने ६८ वर्षीय गेल राजवंशीले सोमबार दिउँसो झुण्डिएर आत्महत्या गरेका हुन् ।

मेलमिलाप समितिका पदाधिकारीहरूले सिधासाधा तथा निर्दोष व्यक्तिलाई जबरजस्ती करणी (बलात्कार) आरोपमा फसाउन खोज्दा सहन नसकेर बुबाले आत्महत्या गर्नु परेको छोरा पर्वलाल राजवंशीले आरोप लगाएका छन् ।
बुबालाई आत्महत्या गर्न बाध्य बनाउने मेलमिलाप समितिका पदाधिकारीहरुविरुद्ध जिल्ला प्रहरी कार्यालय झापामा आत्महत्या दुरुत्साहनमा जाहेरी दिने उनले बताए ।

घटना विवरण अनुसार मृतक राजवंशी अरूको जमिनमा खेतीपाती र जनमजदुरी गरी परिवार पाल्दै आएका थिए । गाउँकै सोझा व्यक्तिमा उनी पर्थे । गत असार ४ गते वडा कार्यालयको मेलमिलाप समितिमा उनको नाममा उजुरी परेको थियो ।

विष्ट थरको घरमा बसोबास गर्दै आइरहेकी अविवाहित तथा मानसिक सन्तुलन ठीक नभएकी ३२ वर्षीया महिलालाई बलात्कार गरी गर्भवती बनाएको आरोप लगाएर उनको नाममा उजुरी परेको थियो ।

‘उजुरी परेपछि मेलमिलाप समितिका सुरज रेग्मी लगायतले बुबालाई चर्को दबाब दिएर घटना घटाएको भनी स्वीकार गर्न लगाएको थियो,’– छोरा पर्वलालले भने – ‘बुबाले आफूले यस्तो काम नगरेको पटक–पटक भन्दा पनि उनीहरु त्यसलाई मान्न तयार भएनन्, उनलाई छुट्टै कोठामा राखेर मानसिक दबाब दिइराखे । परिवार तथा छरछिमेकले समेत उहाँले यस्तो हर्कत गर्न सक्नु हुन्नभन्दा पनि मेलमिलाप समितिले त्यसलाई मान्न चाहेन । त्यो दिनको दबाबपूर्ण छलफल पश्चात् समितिले आइतबार फेरि छलफल बोलायो ।

आइतबारको छलफलमा पनि उनीहरूले एकलौटी ढङ्गबाट राजवंशीलाई दबाब दिइराखे । समितिका मान्छेहरूले अन्ततः सोमबार दिउँसो ३ बजेभित्र महिलालाई जिम्मा लिनु, नत्र प्रहरी कार्यालयमा बलात्कार मुद्दा लगाएर जेल हालिदिने धम्की नै दिएको मृतकका ज्वाइँ शेखरकुमार राजवंशीले बताए । ससुराबाबुले त्यसलाई सहन सक्नु भएन– उनले भने । घरको आँगनमा सुतिरहेको मौका छोपी घर नजिकै खेतको ग्वालीमा गएर झुण्डिनु भयो– ज्वाइँ शेखरकुमारले भने । बिहानदेखि नै परिवारका हामी सबै सदस्य तनावमा थियांै । ३ बजे महिलालाई जिम्मा लगाउने समय तोकिएको थियो । ससुराबाबुले साढे १२ बजेतिर नै संसार छाडेर जानुभएछ,– उनले भने –यो आत्महत्या होइन यो हत्या गराइएको हो, समितिका पदाधिकारीहरूलाई कानून बमोजिम कारबाही हुनुपर्छ ।

यता घटना पश्चात् वडा प्रहरी कार्यालय भद्रपुर र जिल्ला प्रहरी कार्यालय झापाको प्रहरी टोली पुग्दा मृतकका परिवारजनले शवलाई उठाउन दिएन । उनीहरूले मेलमिलाप समितिका पदाधिकारीहरूलाई पक्राउ गर्नुपर्छ भन्ने माग राख्दै अवरोध पु¥याएका थिए ।

एसपी केसीको आश्वासन पश्चात् उनीहरूले शवलाई कानूनी प्रक्रियामा लैजान दिएका थिए । शवलाई पोस्टमार्टमका लागि बिपी कोइराला स्वास्थ्य विज्ञान प्रतिष्ठान धरान पठाएको प्रहरीले जनाएको छ । त्यहाँ शवको डिएनएसमेत परीक्षण गरिने बताइएको छ ।

LEAVE A REPLY

Please enter your comment!
Please enter your name here