काँकरभिट्टा,
मेचीनगर नगरपालिकाका प्रमुख विमल आचार्यले शनिबारदेखि शुरु हुने राष्ट्रिय खोप कार्यक्रम दादुरा रुबेला खोप अभियानमा सहभागी हुन आम नगरवासीमा आग्रह गर्नुभएको छ ।
शुक्रबार मेचीनगर नगरपालिका स्वास्थ्य शाखा, झापाले नगरपालिकाको सभाहलमा आयोजना गरेको नगरपालिका स्तरीय अभिमुखिकरण एवम् अन्तरक्रियामा बोल्दैं प्रमुख आचार्यले उक्त कुरा बताउनुभएको हो ।
खोप पाउनु हरेक वालवालिकाको नैसर्गिक अधिकार भएकाले हरेक अभिभावकले आफ्ना बालबालिकालाई अभियानमा सहभागी गराएर खोप लगाउनु मुख्य कर्तव्य भएको नगरप्रमुख आचार्यको भनाई थियो । फागुन १० देखि १८ गतेसम्म सञ्चालन हुने दादुरा रुबेला खोप अभियानमा नगरका १५ वटैवडाका ९ महिनादेखि ५ वर्षमुनिका ९ हजार ५ सय ४० जना बालबालिकालाई दादुरा रुबेला खोप लगाउने शाखाले जनाएको छ ।
यसैगरी अभियानको क्रममा नगरभरिका जन्मेदेखि ५ बर्षमुनिका ११ हजार ६ सय ३६ जना लक्षित बालबालिकालाई पोलियो थोपा समेत खुवाउने शाखाका सहसंयोजक रामनारायण यादवले जानकारी गराउनुभयो ।
प्रमुख आचार्यले दादुरा रुबेला खोपका लागि ९ महिनादेखि ५ वर्षमुनिका तथा पोलियो खोपकालागि जन्मेदेखि ५ बर्षमुनिका बालबालिका लक्षित समूह भएकाले हरेक नगरवासीहरुले ती लक्षित समुदायलाई नजीकको खोपकेन्द्रसम्म पुर्याउन सहयोग गर्नुपर्ने बताउनुभयो ।
अहिले बजारमा जसरी खोपका बारेमा नकरात्मक प्रचारहरु आइरहेका छन् त्यसको पछि नलागेर सवैले आफ्ना बालबालिकालाई समयमै खोपकेन्द्रमा लगेर खोप लगाउन समेत आग्रह गर्नुभयो । चेतना र शिक्षा अभावका कारण अहिले पनि खोपलिनबाट धेरै बालबालिका बञ्चित भएकाले स्वास्थ्यकर्मीले सवै समुदायमा शिक्षा र चेतनामुलक कार्यक्रम लैजान सुझाव दिनुभयो ।
नगर उपप्रमुख मीना पोखरेल उप्रेतीको सभापतित्वमा भएको कार्यक्रममा शाखा सह संयोजक यादवले दादुरा रोगका जटिलता, कार्यक्रमको अपेक्षित लक्ष्य, उद्देश्य, दादुरा रुबेला रोगको परिचय पृष्ठभूमि, अवस्था र अभियानको औचित्य, दादुरा रोगको परिचय, सर्ने तरीका, लक्षण् र चिन्हहरु, रोगको उपचार तथा बच्ने उपाय रोग सर्ने तरीका, रुबेला रोग लागेमा हुने जटिलताका बारेमा सहभागीहरुलाई जानकारी गराउनुभयो ।
कार्यक्रममा धुलावारी माविका प्रधानध्यापक महेन्द्रविलास लुइटेल, १४ नम्बर वडाका वडाध्यक्ष शंकरप्रसाद पोखरेल, सवस्थ्यकर्मि दिवारक पौडेललगायतले बोल्नुभएको थियो । कार्यक्रमको सञ्चालन स्वास्थ्यकर्मि दीपेन्द्र चौधरीले गर्नुभएको थियो ।
कार्यक्रममा नगरप्रमुख आचार्य संयोजक तथा उपप्रमुख उप्रेती सहसंयोजक रहने गरी नगरस्तरीय खोप समन्वय समिति गठन गरिएको छ । समितिमा नगरका सवै वडाका वडाध्यक्ष, वडा सदस्य, कार्यपालिका सदस्य, सरकारी कार्यालयका प्रमुख, नगरपालिकाको शिक्षा शाखा प्रमुख , नगरपालिकाका प्रेस संयोजक, नगरपालिकाक्षेत्रका स्वास्थ्य केन्द्रका प्रमुखहरु, महिला स्वास्थ्य स्वय्म सेविका मध्येबाट १ जना, महिला विकास विद्यलायका प्रधानध्यापकहरुमध्येबाट१ विद्यालय व्यवस्थापन समितिका अध्यक्षहरुमध्येबाट १ जना सदस्य रहने निर्देशिकामा उल्लेख छ ।
सुचना एवम सन्चारका लागि प्रेस संयोजक ज्युलाई धेरै धेरै धन्यवाद…! यसै गरि आम जनतामा सञ्चार पुगोस….!!